A Asociación Galega polas Bibliotecas Escolares e a Lectura,AGABEL, e no seu nome a directiva actual, DIANTE DAS INSTRUCIÓNS DE 2 DE SETEMBRO DE 2013 SOBRE ORGANIZACIÓN E FUNCIONAMENTO DAS BIBLIOTECAS ESCOLARES, desexa manifestar o seguinte:
- Valoramos o interese da Consellería ante as nosas propostas, a oportunidade das instrucións, a súa claridade e a sensibilidade que mostra ante a problemática das bibliotecas escolares.
- Consideramos moi importante a identificación da biblioteca como motor da innovación educativa e o desenvolvemento do currículo. Cremos, tamén, fundamental o recoñecemento do labor do coordinador/a e do equipo da biblioteca.
- Así mesmo é destacable o establecemento dun orzamento propio da biblioteca co fin de dar resposta ás necesidades da mesma para acadar todos os obxectivos recollidos nas instrucións.
Sen embargo, lamentamos profundamente o paradoxo que se dá na actualidade, xa que, a pesar de todas as medidas, é imposible dar cumprimento ás instrucións na maioría dos centros galegos. O minguado cadro de persoal da maioría dos centros e as necesidades crecentes ás que se enfrontan non permiten que, na práctica, os equipos directivos poidan satisfacer as necesidades horarias que se indican. Do mesmo xeito, o minguado orzamento que se enfronta á suba de prezos incrementada pola modificación da taxa do IVE fai inasumible a dedicación do mínimo indicado ás necesidades da biblioteca; téñase en conta que en moitos casos só os gastos en calefacción supoñen o 50% dos gastos de funcionamento dos centros.
Esperamos que a Consellería se achegue cada vez máis ao devir cotián da realidade da escola galega actual que, malia aos esforzos dos equipos de profesores e os equipos directivos ven irrealizables estas tan necesarias instrucións.
Agardamos que o establecemento de garantías para o cumprimento das instrucións, co apoio da Asesoría de Bibliotecas e da inspección educativa contribúa á mellora do funcionamento das bibliotecas para vindeiros cursos, pero precisamos persoal que cubra os tempos de dedicación necesarios, circunstancia que hoxe en día non se dá.
 |
| Os premiados (foto de @alorenzo.64) |
No serán de onte celebrouse en Monforte a entrega dos Premios Irmandade do Libro na súa XXIII edición. Os agasallados este ano foron:
Premio de Honra: Antonio Fernández Maira (Coordinador da Federación de Libreiros).
Mellor Autora do ano: Mª Xosé Queizán.
Mellor Centro Educativo na promoción da cultura: C.E.I.P. Quintela de Moaña.
Mellor Librería do ano: Librería Komic de Santiago.
Mellor Libro do ano: "A noite branca" de Francisco Fernández Naval.
Obra Editorial do ano: "Guías da Natureza" de editorial Baía.
Fomento da Lectura para a web "Galicia encantada".
A nova ten unha alegría engadida, xa que Isabel Vázquez Rosales (a "nosa" Isa) recolleu o merecido premio que lle concederon ao labor na súa biblioteca, a Biblioteca do Cole de Quintela. Parabéns!
Información recollida a través de "Brétemas"
Xa está convocada a Asemblea Ordinaria de AGABEL para o vindeiro 13 de abril. Coma sempre, no Museo do Pobo Galego, en Compostela, a partires das 11.00 en primeira convocatoria, e das 11.30 en segunda. A partires das 12.30, e se a marcha do debate o permite, poderemos comezar a asemblea aberta á que nos comprometemos nos últimos Encontros do PLAMBE, xa que dispoñemos dun lugar axeitado para facelo.
Durante a Asemblea discutirase o documento de AGABEL que resume a modo de decálogo a nosa presenza no mundo das bibliotecas escolares, e que reivindica melloras para o traballo dos responsables e o seu equipo nos centros de ensino. Podes consultalo aquí.
O Salón do Libro Infantil e Xuvenil de Pontevedra abrirá as súas portas entre o 2 e o 23 de
marzo. Esta é a XIV edición, e o tema é “A toda máquina”
O salón contará coma sempre con exposicións e obradoiros.
Os centros de ensino teñen a posibilidade de participar nas
visitas guiadas as exposicións de traballos plásticos, novidades editoriales, e
salas temáticas, algunhas delas decoradas polos alumnos de Belas Artes de
Pontevedra.
A Federación de Libreiros de Galicia convoca
o XXII Premios Irmandade do Libro, que conta coa modalidade Centros de Ensino.
Neste premio valoráranse as actividades relacionadas co fomento da lectura, e a
colaboración coas librerías do contorno durante o ano 2012.
O premio consistirá nunha figura de bronce,
deseño do artista Ismael López, e a entrega de premios celebrarase en Monforte
de Lemos o 20 de abril.
O prazo para a entrega dos traballos remata o
13 de marzo as 14.00 horas
Máis información:
Dende a Coordinadora Galega de Equipos de Normalización e Dinamización Lingüística infórmannos sobre o éxito da convocatoria Recitando a Celso Emilio
Segundo os datos de que dispoñen, arredor de 200 centros xuntaron uns 30.000 rapaces. Centros de Infantil, Primaria, Secundaria, centros públicos e privados (Salesianos, Compañía de María, Sagrada Familia,…)
Esta convocatoria recibiu apoios externos, coma Agabel, Galix, o Ateneo de Santiago de Compostela, o Ateneo de Pontevedra, a concellería de Cultura e a Biblioteca municipal do Concello de Cee, a asociación xuvenil Amencer de Ourense e a Área de NL da Universidade de Vigo (cun recitado desde a terraza da Biblioteca Central) , o Servizo de NL do Concello de Redondela e a Radio local.
Tamén apoiou a convocatoria algún lectorado no estranxeiro.
Foron moitas as iniciativas impulsadas ou apoiadas desde as bibliotecas escolares, e moi difícil escoller entre todas.
Velaí vai unha pequena mostra:
C.P.I. "Santa Lucía" de Moraña:
E.E.I. "Fernández Varela" da Pobra do Caramiñal:
C.E.I.P. "Víctor Sáez" de Mazaricos:
C.E.I.P. Plurilingüe "A Pedra" de Bueu:
I.E.S. "Sánchez Cantón", de Pontevedra:
O Instituto Cañada Blanch de Londres, que saíron á rúa e pedíronlle aos londinenses que leran
un dos versos do poema:
Son estas as iniciativas que manteñen vivas e unidas as bibliotecas, centros de ensino e centros culturais de toda Galiza, que serven como punto de referencia desde as poboacións máis numerosas ata as pequenas aldeas. Grazas aos novos medios podemos seguir propagando e compartindo o amor polo noso e a nosa vocación de divulgalo e de non esquecer o papel que, como docentes, e desde as nosas bibliotecas nos corresponde. Agradecemos á Coordinadora Galega de Equipos de Normalización e Dinamización Lingüística todo o traballo e a ilusión que contaxiaron en todos e todas nós.
Desde AGABEL queremos apoiar a iniciativa RecitandoCesoemiliO impulsada pola Coordinadora Galega de Equipos de Normalización e Dinamización Lingüística. A proposta alude moi directamente ás Bibliotecas Escolares, como núcleos de dinamización da lectura e da cultura entre os máis novos e faise extensivo a asociacións, institucións e cidadanía. Conmemoramos o centenario do nacemento de Celso Emilio, pero tamén colaboramos nun proxecto común e ilusionante na defensa da nosa lingua a través da palabra, facendo noso o contido do poema “Deitado fronte ao mar”. AGABEL anima a participar nesta homenaxe, a facer que cada centro, cada biblioteca, sexa un punto difusor do espíritu que inspira esta proposta. Felicitamos ao IES "As Barxas" polo seu traballo e a súa xenerosidade.
Os membros da directiva de AGABEL fan un repaso dos programas electorais dos partidos con representación parlamentaria actual (PP, PSOE e BNG), e revisan asimesmo os de UPyD, C x G e AGE, concluíndo
- Ningún dos partidos con representación parlamentaria actual en Galicia fai referencia directa ás bibliotecas escolares. Chama especialmente a atención, dado que os tres apoiaron o PLAMBE nos sucesivos gobernos. O recoñecemento obtido polas bibliotecas escolares galegas é salientable no estado español, toda vez que unha terceira parte dos premios outorgados ás “Boas prácticas” e convocados polo Ministerio de Educación veñen reacaendo nas bibliotecas escolares da nosa comunidade autónoma durante estes últimos anos.
- Nos programas do resto de opcións políticas revisadas tan só C x G fai mención ás bibliotecas escolares.Sen embargo, neste caso, refírese a impulsalas en “todos os centros sen excepción”, aspecto que consideramos máis que superado, xa que non se pode apoiar convenientemente aos centros que non teñen vontade, nen proxecto nen vontade de permanencia no traballo da biblioteca escolar. Menciona tamén o apoio ás bibliotecas a través de “persoal especializado”.
En ningún dos casos se refire á reivindicación máis antiga das bibliotecas escolares galegas, o recoñecemento da figura do bibliotecario escolar, coa súa correspondente liberación horaria, que debe quedar reflectida no ROC.
Agardamos que, goberne quen goberne a partires do día 22 de outubro saiban valorar a importancia que teñen na actualidade, e que deberían seguir tendo no futuro as bibliotecas escolares de Galicia como eixo dinamizador da vida do centro e factor fundamental para a innovación educativa e o desenvolvemento das competencias básicas, así como o traballo dos mestres, mestras e profesorado implicado nas bibliotecas escolares.
Aínda que con retraso, por causas alleas á organización, publicamos a acta de constitución da nova Xunta Directiva. Nestes tempos de incertidume hai que manter a ilusión e, sobre todo, ter claro que o único antídoto contra a invisibilidade é a unión. Ven a conto o fragmento de "Fantasmas de luz", de Agustín Fernández Paz: "... precisamos saber un dos outros, coñecérmonos todos os que estamos na mesma situación". Esta é a realidade que temos, e con ela temos que vivir, sexa como sexa, pero mellor cun punto de encontro. Pois ben, este é o novo comezo.
ACTA DA ASEMBLEA EXTRAORDINARIA DA ASOCIACIÓN GALEGA
POLAS BIBLIOTECAS ESCOLARES E A LECTURA (AGABEL) DO 14 DE XUÑO DE 2012.
Sendo as 18.30 horas (en segunda convocatoria) na cidade de A Coruña
celebrouse a asemblea cun único punto na orde do dia:
1.-
Estudo e votación das candidaturas presentadas para a renovación da Directiva.
Os
presentes acordan manter a asociación cunha directiva formada por :
Susana
Seoane Dovigo (presidenta)
Carmen
Suárez López (vicepresidenta)
Maribel
Serantes Gómez (secretaria)
Emilio
Roca Puente (tesoureiro)
Isabel
Vázquez Rosales (vocal)
Covadonga
Rodríguez Argüelles (vocal)
A
Coruña, a 14 de xuño de 2012
Diante das derradeiras asembleas de AGABEL, desexo contar o seguinte:
Hai xa 12 anos un grupo de profesionais do ensino e das bibliotecas
municipais, preocupados polo abandono das bibliotecas escolares, constituíron
na cidade da Coruña a Asociación Galega polas Bibliotecas Escolares e a Lectura
(AGABEL). Tiñan uns obxectivos moi claros (podedes revisalos na súa web), importantes experiencias que os
respaldaban e, sobre todo, moita ilusión. Moitos lembramos aínda aquelas reunións
(semanais!) no Forum, os encontros con escritores, os cafés “literarios” cos
que entramos en contacto con esta asociación.
Durante todos estes anos, o traballo de AGABEL deu saborosos froitos:
alguén recibe aínda na súa biblioteca aqueles inútiles lotes de libros, alguén
di que o centro non dispón dun ordenador para uso exclusivo da xestión, alguén
acha en falta unha persoa ou persoas de referencia na Consellería para
responder ás nosas dúbidas, alguén non dispón dun programa de xestión en rede para
catalogar os seus fondos, alguén di atoparse só e sen axuda doutros centros
para desenvolver os seus proxectos, saír de dúbidas, alguén di ter falta de
formación…?
Moitos poden argüír que todos estes recursos foron obra dunha sabia
administración educativa. Pero se miramos as cifras do total do Estado saltan
logo as preguntas: “Por que as bibliotecas escolares galegas se diferencian
tanto das demais? Por que somos tomados como exemplo de boa xestión, de
imaxinación, de cooperación? Por que cando saímos fora de Galicia todos os
nosos compañeiros nos felicitan?” Probablemente porque o deseño do desenvolvemento
das bibliotecas escolares se fixo “desde dentro”, desde a experiencia, dando
resposta ás auténticas necesidades plantexadas polos profesionais do ensino,
por nós, que tiñamos unha voz única que sempre nos representou con datos e
plans realizables diante dos sucesivos gobernos de Galicia.
Todos os que se incorporan agora a esta “familia” do PLAMBE deben saber que
estas conquistas non foron obra da xenerosidade dos conselleiros ou directores
xerais, senón froito do traballo de todos, e que entre eses todos sempre
perviviu o espírito de AGABEL. Foi a axuda desinteresada, a man acolledora, a
que nos amosou exemplos de boas prácticas noutros países e nos dixo: “Nós tamén
podemos, por que non?”, a voz que falou nos despachos e que puxo a cara e
sinatura a todas as nosas reivindicacións, a que nos contou o que se estaba
cocendo nos DOG, e que afectaba e afecta á nosa formación (asesorías dos
CEFORE) e á nosa organización (ROC).
Temos agora a sensación de que por fin, “fixemos cumio”. Parece que o noso
traballo está rematado. Xa chegamos ao alto da montaña pelexando, sufrindo,
mesmo perdendo equipo polo camiño. E agora que estamos aquí, so queda descender
e rematou a aventura. De verdade é isto así? Xa non hai máis cumios que
alcanzar? A partir deste momento, veremos unha vez e outra repetida a nosa
fazaña desde o noso salón, sen buscar máis nada, porque non hai máis nada que
buscar?
E agora que? Supoño que o recurso será queixarse a través da rede (porque
motivos hainos), desafogarnos, chorar xuntos, criticar a este ou aquel, e
pechar logo o computador para seguir coa nosa vida. Bonito plan. Daremos por
certo que as nosas asesoras (esas polas que tanto pelexamos e que tanto
pelexan) van transmitir a nosa situación aos seus “superiores” polas canles
establecidas. Que serán elas as que “se queixen” da escasez de persoal, da
falta de horarios, da falta de recoñecemento, da non existencia sobre o papel
da biblioteca escolar (aínda estamos nesta situación) e da ausencia de medios e
de cartos (que vai chegar). Así de ben organizadiño. Pois non. Este mundo non
funciona así. Temos que facelo nós, so nós podemos facelo.
A última directiva de AGABEL rematou o seu mandato, e na Asemblea celebrada
en Compostela o pasado 12 de maio non foi presentada ningunha candidatura. O
noso presidente en funcións anuncia a convocatoria de dúas últimas (se cadra
derradeiras) asembleas: as que certificarán a defunción da nosa Asociación Galega
polas Bibliotecas Escolares e a Lectura. Non nos enganemos: deixar morrer
AGABEL vai ser o comezo do fin do noso labor. É a proba máis clara de que a
crise tamén chegou ao noso corazón, aquel que bombea ilusión e fe no noso
traballo. Vese que agora, ese noso corazón xa non ten materia que repartir, e
que o noso corpo, ese que antes era forte, vivo, animado, non foi quen de
enxendrar máis que cifras que enchen as nosas bibliotecas, os orzamentos, os
balances de resultados. Se non hai quen tome o relevo, esta andaina remata o
vindeiro 9 de xuño. Os que, ademais de estar indignados, teñan capacidade de
reacción e iniciativa teñen a palabra.
Secretaria de AGABEL
ACTA DA ASEMBLEA ANUAL ORDINARIA DA ASOCIACIÓN GALEGA
POLAS BIBLIOTECAS ESCOLARES E A LECTURA (AGABEL) DO 12 DE MAIO DE 2012.
Sendo as 11,00
horas (en segunda convocatoria) e en Santiago de Compostela celebrouse a
asemblea coa seguinte Orde do Día:
1.- Lectura e
aprobación, se procede, da acta da sesión anterior.
2.- Informe do
estado de contas.
3.-
Informe de actividades desenvolvidas.
5.-
Renovación da xunta directiva: presentación e votación das candidaturas
presentadas.
7.-
Rogos e preguntas.
1.- Tras a lectura da
acta da asemblea
anterior, foi aprobada.
2.- Informe do estado de contas
Ingresos por cotas: 2.007 euros
Gastos: 796,56 euros
Saldo
a 1-V-2012: 5.634,30 euros
Aprobouse o
estado de contas.
3.- Informe de
actividades desenvolvidas.
-Redactouse
unha proposta sobre os borradores de ROCs das Escolas de Idiomas e dos
Conservatorios de Música e Danza. En abril 2010 foi enviado a CIG, CCOO,
FETE-UGT e á Consellería de Educación.
-Celebración
do décimo aniversario da asociación.
-Nos
Encontros do PLAMBE, 16-IV-2010 foron repartidos trípticos, fotocopias e
bolígrafos.
-Entrevista
con J. L. Mira Lema. Director Xeral de Educación.
-30-X-10
Publicación dunha entrevista en Galicia Hoxe
Mantemento
do blog.
-Xaneiro
2011: solicítase entrevista con J. L. Mira Lema. Director Xeral de Educación pola publicación dun ROC.
-18-V-11:
Entrevista con J. L. Mira Lema. Director Xeral de Educación.
-De
cada entrevista enviouse a cada socio/a o seu informe correspondente.
-Finais
de maio 2011: protesta polo borrador da orde de formación sen asesorías de BE,
enviando faxes ao Conselleiro e aos dous directores xerais.
-En
marzo de 2011 o presidente comunica a súa dimisión aos outros membros da
directiva. Como non se conta coa existencia de ningunha candidatura alternativa
á Directiva, o presidente decide non convocar a
asemblea anual nin pasar ao cobro os recibos do 2011.
5.- Renovación da xunta
directiva: presentación e votación das candidaturas presentadas.
Como
non hai candidaturas presentadas, o presidente propón:
-Convocatoria
dunha asemblea extraordinaria para tratar de acadar a presentación dunha
candidatura, en varias semanas e na Coruña.
-En
caso de non presentarse ningunha candidatura, celebrar, inmediatamente outra
asemblea extraordinaria para proceder á disolución da asociación, tal e como
recollen os nosos estatutos, que ao respecto din:
“Art. 35
A Asociación poderase
disolver :
a)
Por vontade das/dos
asociadas/asociados, expresada mediante acordo da Asemblea Xeral.
…
O acordo de disolución adoptarase pola Asemblea Xeral, convocada ao efecto, por
maioría de 2/3 das/dos asociadas/asociados.
Art. 36
No caso de disolverse a
Asociación, a Asemblea Xeral que acorde a disolución nomeará unha comisión
liquidadora, composta por cinco membros da xunta directiva, que se fará cargo
dos fondos que existan, para que, unha vez satisfeitas as obrigas, o remanente,
se o houbese, sexa entregado a calquera entidade legalmente constituída con
enderezo nesta provincia ou a unha comunidade que se dedique a iguais ou, no
seu defecto, análogos fins aos desta Asociación.”
7.-
Rogos e preguntas.
Non
habendo nin rogos nin preguntas, rematouse a asemblea ás 12,30 horas.
DE BIBLIOTECAS ESCOLARES E OS SEUS RESPONSABLES
Os profesores e profesoras da Rede profesional de bibliotecarias e bibliotecarios escolares da provincia de Córdoba reunidos na última sesión anual dos Encontros de bibliotecas escolares no Centro do Profesorado de Córdoba o día 24 de abril de 2012, acordaron por unanimidade subscribir o presente escrito e elevalo a quen corresponda:
As bibliotecas escolares constitúen un recurso imprescindible para a educación e o seu defensa, protección e apoio supón unha necesidade máis aínda nestes tempos, a pesar de que non sexan economicamente os máis prósperos. Non podemos consentir que se interrompa o arduo traballo de todos estes anos, nin podemos seguir na continua provisionalidade dos últimos. Este apoio ás bibliotecas escolares, aos seus responsables e equipos, debe reflectirse de xeito claro e inequívoca na lexislación que a Xunta de Andalucía prepara, e debe mirar ao futuro coas altas perspectivas que competen á misión que desempeñan. Por esa razón, pedimos:
Que a redución horaria semanal do responsable da BE sexa equiparada ao resto dos proxectos educativos, a tenor do disposto na ORDE de 3 de setembro de 2010, pola que se establece o horario de dedicación do profesorado responsable da coordinación dos plans e programas estratéxicos que desenvolve a Consellería competente en materia de educación.
Que se cre o departamento de biblioteca escolar nos centros.
Que se evite a provisionalidade no cargo de responsable de biblioteca escolar dos nomeamentos limitados a un ano.
Que as direccións dos centros poidan solicitar dotación de equipamento, mobiliario e adecuación de espazos, previamente argumentados e xustificados.
Que, independentemente doutro tipo de ingresos que poida ter a BE, adecúese debidamente o orzamento dos centros educativos, de forma que a dirección do centro estableza un orzamento anual ordinario para o mantemento da biblioteca escolar que oscilaría entre o 5% e o 10% do total do centro, tal como establece a UNESCO.
Que se integre a biblioteca escolar no centro a través da presenza do seu responsable no ETCP.
Que se procure especialmente que a normativa non se preste a interpretacións e sesgos, de forma que a súa redacción sexa explícita respecto das horas de dedicación e á adxudicación de recursos materiais e humanos.
Que a biblioteca escolar estea presente na formación xeral do profesorado con obxecto de que se coñeza e respecte o seu uso na práctica educativa, especialmente na formación de directivos, de profesorado en prácticas e de máster.
68 profesores e profesoras de primaria e secundaria de centros públicos da provincia de Córdoba
Córdoba a 24 de abril de 2012.
Este vídeo foi rodado en centros do Plan de mellora de bibliotecas
escolares de diferentes recunchos de Galicia, e presentouse no Congreso Bibliotecas Escolares en Tránsito,
celebrado en Compostela os días 10, 11 e 12 de novembro, organizado
pola Consellería de Educación en colaboración co Ministerio de
Educación.
As imaxes exemplifican a distribución de espazos nas novas bibliotecas, e algunhas das actividades que o alumnado realiza nelas día tras día.
As imaxes exemplifican a distribución de espazos nas novas bibliotecas, e algunhas das actividades que o alumnado realiza nelas día tras día.
Texto e vídeo vía Bibliotecas escolares de Galicia.
Manifesto conxunto de protesta ante o borrador de Formación do Profesorado
0 comentarios Publicado por Antonio MartínezMANIFESTO CONXUNTO DAS BIBLIOTECAS ESCOLARES DE GALICIA
Ante a previsible retirada de formadores específicos no ámbito das bibliotecas escolares no Servizo de Formación do Profesorado, no Centro Autonómico de Formación e Innovación e nos centros de formación e recursos dependentes da Dirección Xeral de Educación, Formación Profesional e Innovación Educativa, segundo o borrador da orde que convocará concurso público de méritos para cubrir postos de persoas directoras e asesoras nestes centros queremos manifestar o seguinte:
A insoportable levedade das bibliotecas escolares galegas
Hai proxectos que nacen marcados pola vulnerabilidade e a razón desta circunstancia non ten nada que ver coa falta de rigor ou a pouca entrega das persoas que os poñen en marcha. Máis ben ten que ver co feito de que nacen destinados a nadar contra corrente. Con todo, esa é a principal razón da súa existencia: xorden porque responden a unha necesidade non satisfeita pero compartida por un número crecente de persoas que senten que é posible compartir e facer viable o proxecto xuntos. Así naceu o movemento que cristalizou na iniciativa que todos coñecemos como PLAMBE. De xeito que dende hai algúns anos, esa iniciativa levou o mellor da creatividade e o esforzo de moitos docentes que xenerosamente regalaron o seu tempo e a súa capacidade de formar equipos e ilusionar a outros docentes en centros e centros de toda a nosa comunidade. Xuntos aprendemos a ser rigorosos e esixentes nos nosos proxectos, a crear espazos de aprendizaxe colaborativo, de cambios de estratexia, de achegamento ás novas tecnoloxías, de racionalización na xestión da información. Que ninguén se equivoque: os responsables das bibliotecas escolares non son seres evanescentes perdidos en vanas quimeras que tentan “roubar” horas a materias “importantes” para que o alumnado esmoreza entre mundos de ficción. Nada máis lonxe da realidade. Nun centro onde hai un equipo que xestiona a biblioteca de forma eficaz nótase. Os fondos adquírense con criterio, establécense acordos para xestionar a información, créanse espazos de colaboración e docencia compartida. Non é doado porque a maquinaria educativa ten unhas inercias difíciles de combater. A pesar de todo, estes docentes fórmanse e exercen a súa dura misión en horas non retribuídas, roubadas ás súas familias, ao descanso, ao lecer. Fomos coordinados con rigor e seriedade pola Asesoría de Bibliotecas Escolares pero sempre nos faltou o marco legal axeitado. A nosa misión é dura porque queda moito por definir. Na nosa inxenuidade e boa fe esperabamos conseguir progresivamente tempos e formación para seguir mellorando na nosa función se demostrabamos que eramos rigorosos e eficaces. Os nosos méritos como colectivo son dabondo coñecidos polos nosos gobernantes e acreditados por diferentes administracións e ámbitos a nivel estatal. Os numerosos e constantes premios anuais de boas prácticas concedidos polo Ministerio de Educación y Ciencia non caeron do ceo. Durante todos estes anos a formación recibida foi fundamental para levar a cabo actuacións rigorosas e enfocadas na dirección correcta. Sabemos das cuantiosas axudas que a Dirección Xeral de Educación, Formación Profesional e Innovación Educativa, destina a outros proxectos, dos incentivos para a elaboración de contidos dixitais por parte das empresas editoriais, entre outras iniciativas. Non sería tamén interesante fomentar a produción de materiais propios e promover desde cada centro a estandarización de procedementos que axuden a xestionar a información entre o noso alumnado sen confiar todo a eses materiais externos que proceden da industria editorial, por valiosos que poidan ser? Por que non seguir aproveitando a experiencia e valía dos equipos das bibliotecas escolares nestes cometidos?. O noso empeño sempre foi crear nos centros pequenos focos que tentan estender esas boas prácticas de innovación e excelencia. Non entendemos este novo e repentino xiro na política de formación desta Dirección Xeral. Non nos parece xusto posto que, podemos dicir honestamente que, pola nosa banda, cumprimos con fartura. Ao desmantelar as estruturas que nos sosteñen o deterioro será proporcional ao entusiasmo e o esforzo investidos: inmenso e imparable. Algúns lembramos como o noso Conselleiro lanzou un bico ao aire ao despedirse dos asistentes aos últimos encontros despois dunhas entusiastas palabras de eloxio polos éxitos logrados polas bibliotecas escolares galegas a nivel estatal. Onde quedou ese entusiamo? Que interpretación debemos facer? O noso país pode permitirse tirar pola borda todo este traballo? E nós?. En que situación quedaremos agora diante das nosas comunidades educativas se despois de tanta insistencia é a propria Consellería a que nos invisibiliza?.
Protesta ante o borrador da Orde de Formación do Profesorado
2 comentarios Publicado por Antonio MartínezO seguinte texto foi enviado ao Conselleiro, ao Director Xeral de Centros e ao Director Xeral de Educación ante a supresión das asesorías de Bibliotecas Escolares nos distintos ámbito da formación do profesorado:
Coñecido por vía sindical o borrador da orde para cubrir postos de asesores/as de formación do profesorado, a Asociación Galega polas Bibliotecas Escolares e a Lectura (AGABEL) quérelle manifestar o seguinte:
Coñecido por vía sindical o borrador da orde para cubrir postos de asesores/as de formación do profesorado, a Asociación Galega polas Bibliotecas Escolares e a Lectura (AGABEL) quérelle manifestar o seguinte:
1º Desde hai once anos, a situación das Bibliotecas Escolares galegas foi, paseniñamente, mellorando. Doues exemplos poden ser a creación da Asesoría nos servizos centrais ou o desenvolvemento do Plan de Mellora.
2º Hai un recoñecemento no Estado á situación actual das Bibliotecas Escolares de Galicia tal e como demostra a cantidade dos premios do Ministerio recoñecendo as boas prácticas que se desenvolven nelas e das que a Consellería presume na súa páxina web.
3º Como vostede ben coñece son aínda moitas as nosas reivindicacións para acadar que as Bibliotecas Escolares ofrezan un servizo de calidade nos nosos centros educativos.
4º Desde que o actual equipo da Consellería está exercendo as súas competencias, o número de asesorías de Bibliotecas Escolares nos distintos Centros de Formación vai diminuíndo.
5º Non hai ningún outro ámbito da docencia que demande tanta formación como as Bibliotecas Escolares, como vostede ben puido comprobar nos distintos Encontros ou Xornadas ás que xa tivo a oportunidade de asistir.
6º Con este borrador dáse o primeiro gran paso atrás nas Bibliotecas Escolares desde que o conselleiro Celso Currás nos recibira por primeira vez hai xa máis de dez anos.
7º Consideramos un verdadeiro ataque frontal ás Bibliotecas Escolares a ausencia de asesorías específicas neste ámbito no citado borrador. Sen formación non pode haber melloría. Sen formación, sen asesores/as específicos, non se pode garantir ningún avance na calidade do servizo que prestamos.
8º Urxímoslle a que faga todo o posible para incluír tanto no Servizo de Formación do Profesorado, no Centro Autonómico de Formación e Innovación, como en todos os Centros de Formación e Recursos, unha praza de Bibliotecas Escolares.
É este o recoñecemento que se da ás bibliotecas escolares para que sexa un dos factores que favorezan a calidade do ensino que menciona a LOE no seu artigo 2.2?
Por último, nos preguntamos onde quedaron o espazo e a consideración que o Conselleiro de Educación daba ás bibliotecas hai algo mais dun ano na súa comparecencia no Parlamento de Galicia para explicar a situación actual das Bibliotecas Escolares e a presentación do plan LIA (Lectura, Información e Aprendizaxe).
8º Urxímoslle a que faga todo o posible para incluír tanto no Servizo de Formación do Profesorado, no Centro Autonómico de Formación e Innovación, como en todos os Centros de Formación e Recursos, unha praza de Bibliotecas Escolares.
É este o recoñecemento que se da ás bibliotecas escolares para que sexa un dos factores que favorezan a calidade do ensino que menciona a LOE no seu artigo 2.2?
Por último, nos preguntamos onde quedaron o espazo e a consideración que o Conselleiro de Educación daba ás bibliotecas hai algo mais dun ano na súa comparecencia no Parlamento de Galicia para explicar a situación actual das Bibliotecas Escolares e a presentación do plan LIA (Lectura, Información e Aprendizaxe).
En setembro de 2010 mantiveramos unha primeira xuntanza co actual Director Xeral de Educación a pesar de que as bibliotecas escolares dependen organicamente da Dirección Xeral de Centros e Recursos Humanos. Naquela reunión quedárase en volver a manter, nun breve prazo, outra posto que o Director Xeral comprometérase a darnos nova información. Habida conta que esa nova información non se produciu no tempo comprometido e que se publicou un novo Regulamento Orgánico dos conservatorios de música e danza (Decreto 223/2010, do 30 de decembro) onde a situación das bibliotecas afectadas non fora mellorada con respecto ao borrador, decidimos solicitar outra entrevista o de xaneiro.
O pasado 18 de maio, tras un aprazamento non imputable á Consellería, o Presidente de AGABEL e unha socia, estivemos charlando durante unha media hora co Director Xeral. Coma na xuntanza anterior, a reunión desenvolveuse nun ambiente cordial e sincero. Foi máis breve e rápida ca anterior.
Repasamos as nosas reivindicacións como colectivo (coñéceas perfectamente) e afondamos en temas de actualidade:
-Situación dos Regulamentos Orgánicos de Centros: xa foron publicados dous decretos: no primeiro a biblioteca practicamente non existe (o xa citado Decreto 223/2010, do 30 de decembro ) e no segundo (DECRETO 77/2011, do 7 de abril, polo que se establece o Regulamento orgánico dos centros integrados de formación profesional) aparece dun xeito mellor que no borrador mais sen garantir a formación do seu responsable e sen garantir un tempo mínimo de dedicación. Sobre os regulamentos de Infantil, Primaria e Secundaria comentounos que se está a espera da aprobación da Lei de Convivencia para desenvolvela (non obtivemos ningún compromiso)
-Tamén nos comenta que no desenvolvemento dos anunciados Contratos-programas haberá un apartado específico para a lectura.
-Sobre as asesorías de bibliotecas escolares nos CFR, contounos que axiña será publicada a normativa que desenvolverá o novo decreto de formación (DECRETO 74/2011, do 14 de abril). Ante a nosa insistencia, volverá estudar a posible presenza dunha asesoría no novo centro de formación Centro Autonómico de Formación e Innovación xa que ata ese día tal asesoría especifica de bibliotecas escolares non estaba contemplada.
-Sobre introducir mobiliario axeitado para bibliotecas escolares no catálogo de equipamento da Consellería, pediunos que lle remitíramos algún estudo técnico ao respecto e que tramitaríao á Secretaría Xeral da Consellería.
A valoración persoal desta xuntanza farémola na vindeira asemblea da asociación.
O pasado 18 de maio, tras un aprazamento non imputable á Consellería, o Presidente de AGABEL e unha socia, estivemos charlando durante unha media hora co Director Xeral. Coma na xuntanza anterior, a reunión desenvolveuse nun ambiente cordial e sincero. Foi máis breve e rápida ca anterior.
Repasamos as nosas reivindicacións como colectivo (coñéceas perfectamente) e afondamos en temas de actualidade:
-Situación dos Regulamentos Orgánicos de Centros: xa foron publicados dous decretos: no primeiro a biblioteca practicamente non existe (o xa citado Decreto 223/2010, do 30 de decembro ) e no segundo (DECRETO 77/2011, do 7 de abril, polo que se establece o Regulamento orgánico dos centros integrados de formación profesional) aparece dun xeito mellor que no borrador mais sen garantir a formación do seu responsable e sen garantir un tempo mínimo de dedicación. Sobre os regulamentos de Infantil, Primaria e Secundaria comentounos que se está a espera da aprobación da Lei de Convivencia para desenvolvela (non obtivemos ningún compromiso)
-Tamén nos comenta que no desenvolvemento dos anunciados Contratos-programas haberá un apartado específico para a lectura.
-Sobre as asesorías de bibliotecas escolares nos CFR, contounos que axiña será publicada a normativa que desenvolverá o novo decreto de formación (DECRETO 74/2011, do 14 de abril). Ante a nosa insistencia, volverá estudar a posible presenza dunha asesoría no novo centro de formación Centro Autonómico de Formación e Innovación xa que ata ese día tal asesoría especifica de bibliotecas escolares non estaba contemplada.
-Sobre introducir mobiliario axeitado para bibliotecas escolares no catálogo de equipamento da Consellería, pediunos que lle remitíramos algún estudo técnico ao respecto e que tramitaríao á Secretaría Xeral da Consellería.
A valoración persoal desta xuntanza farémola na vindeira asemblea da asociación.
Desde o blog Afonsa le e conta da biblioteca do IES Fontem Albei da Fonsagrada, chéganos este impresionante vídeo. Parabéns.
;;
Subscribe to:
Entradas (Atom)
